一名就讀東華三院黃笏南中學的中五男生林澤駿昨日（19日）在Instagram發布一條約7分鐘的影片，表示已就男生 髮禁 的問題向平機會投訴「學校髮禁違反性別歧視條例」，個案已經受理，下一步將進行調停或者調查。

林澤駿指自己可能是第一個就男生髮禁向平等機會委員會投訴的人，他更清晰有條理地解說投訴的原因。他的帖子獲得媒體達人楊永樂（Terry）大讚「好佩服、好有型、好有前途」。

教育局局長蔡若蓮回應事件：「我們都曾經讀過書，我自己亦曾當過老師，我們會知道每一間學校有其文化，在教學上，除了知識、技能外，態度和價值觀亦重要，所以學校會因應同學的價值觀教育或學校希望營造的校風，有相應校本的校規。就校規的規定，《學校行政手冊》清楚列明指引，我們相信學校會因應專業處理。」

短片連結：https://www.instagram.com/tv/CgL2tIevX19/

7分鐘短片內容：「自從梁國雄司法覆核案頒布陳詞後，相信唔少男同學都喺度諗學校唔允許男同學留長頭髮係咪違法行為。當然，我都係其中一個。

但我一直喺網上尋找資料，發現似乎冇人就呢個問題作出行動，喺網上你搵唔到校規 男生髮禁是否違反性別歧視條例嘅資料。我唔知有冇前人做過，但係我相信呢個社會、同我有一樣苦衷嘅同學都需要一個答案。

我自己係有少許嘅性別焦慮，所以我唔希望係畢業後仍然係短頭髮，我毅然向學校提出想法，但當然冇人允許。籌備咗好多，我終於可以向公眾說明我嘅狀態。我亦都有決心係全港推動廢除髮禁校規！

個半月前，正正喺我被威脅唔剪頭髮就會被剝奪參與學校活動或停學之後，壓力下我被迫剪咗。我嘅心情都隨之消沈一段時間，但我認識到消沈落去唔係辦法，我必須作出改變，隨後我亦都寫妥投訴文件，電郵比平機會。
喺補充論據之後，平機會就確認會安排為我進行調停。

但係我嘅頭髮已經失去咗，冇辦法一日就生返，我拍呢條片，展示一個唔自信嘅自己比大家，係喺度掀開自己嘅傷疤。

但我好希望做到嘅係推動學校廢除男生髮禁，所以我想透過呢條影片，引起大家對男生髮禁嘅討論，亦都希望大家知道男生髮禁仍有不合理嘅地方。

以下我將會，表達我對學校男生不允許留長頭髮嘅觀點。

首先，學校可能會以學校聲譽去禁止男生留長頭髮。如果真係咁樣嘅話，學校制定呢條校規係有機會違反性別歧視條例。拋開規例黎講，事實係男生留長頭髮未必會影響學校聲譽，一間學校嘅教學水平，並唔係透過學生嘅髮型睇得出。學校體量之大，學生其實難以損害學校聲譽。

其次，學校可能會以男生留長頭髮不整潔、容易污糟而禁止男生留長頭髮。事實上呢句說話充斥著不少矛盾同埋偏見。學校默認咗留長頭髮就係邋遢、不整潔，但事實上學生每日返學前都會梳洗，難以睇到男生留長頭髮一事直接等於不整潔。況且大多女生也是留著長髮，還不是好好的嗎。

學校咁耐以黎都係教導緊學生唔可以以貌取人，但係學校卻害怕學生的髮型會影響聲譽。對於一路以黎教導嘅價值觀，係咪自相矛盾？咁樣睇，學校有冇資格教學生唔好以貌取人呢？或者學校唔做出改變嘅話，社會會唔會都一齊停滯不前？

老師曾經同我講，若果街外人投訴學生頭髮過長，學校會不知所措。但我認為遵從學校嘅價值觀，學校係唔應該理會呢啲評論。就好似如果陌生人向學校投訴，學生的樣子太難看一樣，該等投訴唔應該被接納、理會。更何況投訴一事僅僅只係假設，我並不認為係教育水平頗高嘅香港，會有人胡亂作此等投訴。

我諗社會上或學校嘅性別定型令學校唔可以讓男生留長頭髮，佢地認為男生留長頭髮就係爛仔行為、影響市容。佢地不但歧視緊留長頭髮嘅男仔，亦都漠視咗人們留長頭髮嘅原因。性別焦慮、一啲心理嘅問題，我諗係呢個社會、學校仍未考慮到嘅重點。導致佢地對男生留長頭髮仍留有偏見。

最後，我想講嘅係頭髮並唔係同校服嗰啲一樣。校服係你脫離學生身份嘅時候可以除低，但係頭髮唔可以，正如我失去嘅頭髮。冇辦法返黎。學生係學校嘅時間其實無超過10個鐘，學生係咪真係應該為咗10個鐘而放棄其餘時間嘅髮型選擇權呢。我諗大家都需要考慮髮禁其實都凌駕緊學生係校外嘅髮型、自我表達。

面對咁多嘅壓力，其實我忍受咗好多。終於有呢個機會可以向大家表達我嘅睇法。
其實每一個旁觀者都應該望清事情嘅對錯。希望透過呢片影片可以帶出性別歧視以外嘅觀點，大家可以明白而且被說服，髮禁其實係過時嘅。
我都想同我有相同諗法嘅同學講，我相信喺足夠嘅理據下，只要你肯出聲，一定可以搵到人給予你協助。

我希望我公開講嘅嘢係有價值，而且令你地理解更多我嘅感受、觀點。

我相信喺足夠嘅理據下，關於法例所提及嘅歧視，平機會係能夠給予你一定嘅幫助

透過影片可以帶出性別歧視以外嘅觀點，希望大家可以明白而且被說服。」