患有先天性心臟病的5歲「小鐵漢」Kansas，自出生至今已歷經多次大手術，早前再完成機械心瓣更換手術，在7月15日離開兒童醫院後，早前（26日）小鐵漢出現發燒情況，求診過程相當轉折，最終要經過19小時才輾轉送到兒童醫院跟進，爸爸Jayco怒轟：「如果真係併發症，可能已能經失救咗！點解唔可以真接啲？」醫管局就事件致歉，並指香港兒童醫院會繼續跟進病人的醫療需要，並會盡力與家屬一起支援病人早日康復。
兒童醫院只收轉介個案
小鐵漢手術後今有發燒跡象，Jayco與太太即時前往最近他們的天水圍醫院急症室，Jayco接受訪問時指：「去到天水圍醫院照Ｘ光，想話去返負責做手術嘅兒童醫院跟，點知兒童醫院話只收轉介個案，呢樣係我最難以接受嘅地方。」
原來天水圍醫院原來並沒有兒科，即無法做到轉介，醫生建議可到有兒科的屯門醫院跟進轉介，令Jayco勃然大怒：「其實如果囝囝真係手術後嘅併發症，已經『瀨曬嘢』，醫院安排真係好有問題，有併發症可能已經失救咗！」
花五小時才到屯門醫院 未知何時能回兒童醫院
由小鐵漢入天水圍醫院急症室計起，Jayco指已花了四至五小時，直到晚上十點半左右才到達屯門醫院，希望可以轉介到兒童醫院跟進。而經歷過多次大小手術的小鐵漢，因為過往術後也會在醫院住上一段日子，而且多數術後也沒有出現發燒等病徵，今次醫院的安排真的令他感到十分「荒謬」！
13小時仍未有心臟科醫生診症
他們由天水圍醫院轉到屯門醫院後，才發現這邊沒有心臟科醫生。「俾人踢咗過嚟屯門醫院，原來呢邊係冇心臟科醫生，而家仲要等中午主診醫生巡房，先安排到轉去兒童醫院畀心臟科醫生睇佢！由999白車，到天水圍醫院，再畀人踢去屯門醫院，已經超過13小時，連一個屬於心臟科嘅普通觀察同治療都冇。」他對於醫院的安排相當憤怒，稱「絕對係拖延救援同治療，現場病房嘅前線都話冇辦法好無奈，話係個流程嘅規定同限制。」
19小時的求醫旅程
他們經歷了19小時，終於去到可以提供適合兒童心臟病治療的醫院，「冇錯，19小時只係去到兒童醫院求醫，而燒係仲未退嘅(39度)，同埋喺之前嗰兩間醫院都冇做過深入性心臟病診段（斷），不過都總算可以放下心頭上最面果嚿大石…因為終於可以去到一個啱嘅地方求醫…」他說。
Jayco指在過去的19小時內，他跟醫院很多前線醫護傾談，他們對於醫院管理局的機制及流程也感無奈及氣憤，並建議Jayco以病人家屬身分向管理層反映及建議，希望可以幫到更加多病人，免於在這種繁複的流程下，延誤需要針對性儀器觀察及治療的病人。
爸爸：點解系統同流程上唔可以直接啲？
「兒童醫院現時只接受公立醫院嘅兒科轉介入院，即係你去私家醫院嘅話，都要先轉介你去公立醫院嘅兒科先至再可以去到兒童醫院。而好似天水圍醫院哩（呢）啲冇兒科嘅醫院，就要先轉你去聯網內最近嘅公立醫院兒科訓（瞓）一晚先至再轉到你去兒童醫院(好似小鐵漢咁)。」Jayco指當中原因是兒童醫院要辦工時間內才會接轉介個案，他說：「有一位護士嘅說話令我好深刻，佢話：『唔通兒童醫院嘅管理層覺得佢哋出院嘅case係唔會有urgent？！』 佢仲話，其實各大醫院接到好多case都係咁樣安排，亦唔明白點解系統同流程上唔可以直接啲。」
Jayco覺得前線醫護工作已經好繁忙好大壓力，在這樣繁複的流程下，前線醫護需要要犧牲照顧病人的時間，去做一堆無謂的paperwork，才能將個病人轉入轉出，同時更會拖延對病人的治療。
「我嘅建議好簡單，點解唔可以真接啲？病童喺兒童醫院完成手術後嘅一個特定時間，如果病童身體出現問題或者不良反應，可以直接去兒童醫院求醫，而唔係好似而家咁，要走流程走咗19小時先可以去到一個可以提供適合治療嘅醫院求醫…而問題(病)係仲未解決嘅… 」Jayco指慶幸在這19小時內，小鐵漢沒有病情惡化跡象。他怒轟：「但如果係其他小朋友呢？ 哩（呢）19個小時入面真係可以發生好多預計唔到嘅嘢… 19小時嘅流程？原意係咩？係幫助病人得到最快嘅醫治？定只係一種管理手段？」
醫管局：就他們在求診過程中的不快致歉
記者就此事向醫院管理局查詢，發言人回覆指病人（小鐵漢）現時正在香港兒童醫院留醫，醫療團隊會為病人提供適切的治療及詳細跟進其臨床需要，並會盡力為家屬提供所需協助。
發言人指：「病人一直由香港兒童醫院的心臟科團隊照顧，今年七月中接受例行心導管檢查後，情況穩定出院。醫護人員有跟家屬溝通，及就病人在不同情況下的處理方法提供建議。由於香港兒童醫院不設急症室或普通科門診，醫護人員建議病人在遇到緊急情況時，應盡快前往就近急症室，由急症室醫生先提供治理，再按需要轉送香港兒童醫院跟進。」
「另一方面，香港兒童醫院心臟科一直推行高風險病人出院後緊密監察計劃，例如剛完成複雜心臟手術或介入程序的病人，醫護人員除了定期致電跟進其情況，亦向他們提供電話號碼，當身體出現不適或有疑問時可直接致電心臟科查詢。醫護人員會評估病人情況是否與其心臟問題或最近的手術／治療有關，並作出相應建議，包括先到私家醫生或地區醫院求診以處理有關問題；如有緊急情況則應前往就近急症室，以盡快穩定情況。如心臟科評估個別病人情況需要立即由香港兒童醫院處理，病人可直接入住該院心臟科病房而無需經其他醫院轉介。」
醫管局發言人指非常理解病人家屬的擔憂心情，「並就他們在求診過程中的不快致歉。香港兒童醫院會繼續跟進病人的醫療需要，並會盡力與家屬一起支援病人早日康復。」
爸爸建議設「術後出院觀察期」保障病童
Jayco指醫管局雖然為此事致歉，但流程依舊，而且這件事不只關係他們一家，而是所有病童。「其實簡單直接啲，為所有喺兒童醫院剛完成手術嘅病童設立一個特定嘅『術後出院觀察期』，喺哩（呢）個『術後出院觀察期』內，病童身體有咩不良反應或不適可以直接向兒童醫院求醫無需經其他醫院轉介咪得囉…」他說。