孫慧雪早前在社交媒體分享，前工人姐姐不但借錢走佬、在外留宿等有「七宗罪」，日前更因為她一個壞習慣而令雪雪一家過了一個臭氣沖天的聖誕節，需要2個通渠師傅「救命」。

孫慧雪的前工人姐姐十分「離奇」，曾「神力」把窗戶推落街，又嘗開洗衣機只洗自己的衣服，更每天要求me time等等。早前，雪雪憤而怒炒前姐姐，竟然又兜轉發現她向丈夫的好友求職。

剛過去的聖誕節，想不到雪雪仍要飽受前工人姐姐遺留的「蘇州屎」：爆屎渠，更有poo poo倒流。「第一位去我屋企通渠嘅師傅，通通下放棄咗，唔收錢就走咗啦！之後搵咗位相熟嘅通渠師傅，就係圖中呢位伯伯，佢好好人，用咗足足兩日幫我通拆晒所有座廁同櫃，結果通完發現，渠管原來堆積咗一堆之前嘅工人姐姐沖落廁所嘅毛巾同手套！」

孫慧雪樂觀：朋友話呢間係風水屋 爆完又爆

孫慧雪在請工人姐姐，以及和工人姐姐的相處上可謂歷盡辛酸。「朋友都話我呢間係風水屋，又爆水，又爆poo poo，係會發達嘅，當然我唔係希望咁樣幫助財運啦，多謝大家嘅安慰！」

而她亦透露已請到好的工人姐姐，希望她苦盡甘來吧！「大家唔使擔心我，因為我而家已經搵咗位好好好好嘅姐姐，但之前呢位博炒嘅姐姐，喺請佢嘅時候，睇佢嘅履歷，明明係本地完約姐姐，但係我呢位好好姐姐話俾我聽，佢睇到佢入境處份文件，吸咗個紅印，其實佢係斷約姐姐，只係隱瞞左之前嘅履歷，其實我都唔明係點樣做到，不過想叫大家小心啲，同埋有時屋企啲嘢整壞咗，可能真係有原因㗎！」