與未婚妻同買樓事主買逾3千元電競椅遭𠝹爛決定悔婚

雖然俗語有「Happy Wife Happy Life」之說，不過近日有網民對未婚妻的行為感到憤怒和失望，因為一張電競椅而決定「放生」未婚妻。

日前，有網民在網上群組「巴打絲打「00九吹專區」Facebook Club」分享個人經歷。

他與「前．未婚妻」一齊買樓，早前入伙，基本上所有裝修都由女方決定。

佢中（鍾）意咩日系木調，搞到成間屋診所咁都由佢，但我唯一小小夢想就係有張打機專用電競椅啫。都知事前講一定唔批，咪諗住先斬後奏，買咗送咗貨米已成炊，佢都應該會包容掛（啩）。

果日佢放工番屋企見到我張電競椅，即刻西晒面，我諗住灰諧啲話：「Maserati超跑就買唔起，但總算買到佢張櫈！」結果佢搵鎖匙掉我，逼我退番張櫈，話唔襯佢間屋，問我做呢件事之前有無諗過佢唔鍾意，有無尊重過佢…X咩，佢裝修前都無問過我中唔中意診所風格啦，我都只係買一件，係一件自己心水傢俬啫，所以當下我堅持唔跪。

結果第二朝，我起身就見到張愛椅比人割爛咗，佢好冷淡話：「而家解決咗啦，你攞張櫈落去掉，下次唔好嘥錢亂買嘢」嘩，我望住張受重傷嘅電競椅真係好心寒，好似突然睇清楚呢個女人…所以就番咗自己屋企無再番新屋。

前．未婚妻嘅阿爸阿媽有搵過我，叫我唔好意氣用事，幾廿歲人仲為咗打機、電競椅呢啲搞到老婆唔開心，以後結婚日子點會好過，跟住我就平靜咁向佢哋提出退婚，仲攞埋電競椅張單出嚟要佢哋賠。

點知佢阿爸突然拍枱鬧我：「而家全世界都知你地結婚，為咁咁少事就話退婚，仲話要賠張爛鬼櫈？我個女肯嫁俾你，你執到啦！死廢青！」我都廢事同呢個廢老嘈，好冷靜同佢講會搵律師聯絡佢地，堅持張櫈嘅錢會係賣完樓筆錢度扣。

跟住前．未婚妻係咁想氹返我，但我真係死哂心，同佢講不如我地好好分手。點知佢就癲咗咁日日100個miss call同千字文嚟鬧我，仲威脅我話唔同佢結婚佢就起我底去Facebook群組同討論區度，我只係Cap低哂留俾律師處理。

然後而家忙緊賣樓、退酒席、婚攝果啲嘢。雖然多瑣碎嘢煩，但我覺得係同佢拍拖六年嚟最輕鬆嘅日子，中意打幾耐機都得。都down番交友apps，諗住同多啲人認識下，希望搵到個識得尊重人嘅好女仔。