康文署宣布繼5月推出多項防「炒場」措施後，將於11月1日（星期二）推出4大「辣招」，進一步打擊「炒場」活動，準備租用康文署轄下場所的家長記得要留意！

康文署今次加推4大辣招，包括：

延長「不取場／不在場使用」違規適用期至連續60天

依家租用人喺任何連續30天內錄得2次違規「不取場／不在場使用」，會被暫停預訂收費康體設施資格90天。喺新措施下，由11月1日起，所有有效或新生效嘅「不取場／不在場使用」違規紀錄嘅適用期將由連續30天調整至連續60天，以加重對租用人違規「不取場／不在場使用」嘅阻嚇力。

加重「違規轉讓用場許可證」懲處至360天

租用人因「違規轉讓用場許可證」被暫停預訂收費康體設施資格嘅期限，由依家嘅180天增加至360天，進一步阻嚇懷疑「炒場」活動。

草地足球場抽籤1+4 ，簽場及使用1+3

「康體通」用戶現只須以用戶本人嘅用戶編號就可透過系統遞交天然同人造草地足球場（不包括多用途草地球場）嘅抽籤申請。由11月1日起，「康體通」用戶喺遞交草地足球場嘅抽籤申請時，必須填報另外4名用場人士嘅「康體通」用戶編號。抽籤申請如獲接納並完成繳款以確認租訂設施後，租用人喺使用足球場前，須與申請時填報嘅其中3名用場人士一併出席並出示身份證明文件正本同認可資格證明（如有需要），以供查核身份同登記。租用人及該3名用場人士必須於所租訂段節在場使用設施。

已取消設施上午 7 時起可網上重新預訂

由11月1日起，已取消嘅設施段節嘅重新預訂時間，將於上午 7 時 30 分調整至上午 7 時正喺網上開始（「康體通」訂場櫃枱及自助服務站將於早上7時15分開始），以喺公平原則下與其他於上午 7 時正開始預訂嘅設施同步俾市民以先到先得方式預訂。

署方會密切留意新措施嘅成效，有需要嘅話會推出更多打擊「炒場」嘅辣招。另外，康文署正開發一套全新智能康體服務預訂資訊系統，取代依家嘅「康體通」電腦預訂系統，以進一步打擊「炒場」活動同防止濫用設施。署方會喺11月1日至30日進行一項網上問卷調查，以收集市民對系統嘅意見。