張致恒（Steven）與老婆區燕雯（雯雯）於2019年奉子成婚，現時育有3名兒子，steven曾被指負債纍纍，雖然他密密往內地登台賺錢還債，但工作量不多的他，要償還債務同時養大3個小朋友，早前雯雯生日，一家五口一齊開Live，期間兩公婆認經常吵大鑊，另有人問到雯雯關於備孕嘅問題，雯雯自爆︰「其實咁多胎都係意外。」隨即被圍插，有網民更指：「冇眼睇」！

Steven與雯雯育有3名兒子，分別是3歲的大仔天寶、2歲的二仔天牧，以及出世只有個多月的細仔天朗，早前張致恒老婆雯雯更暗示生活難捱，令不少網民表示擔心。Steven早前在IG開直播，與網民分享湊仔經，3個兒子也有出鏡，而老婆雯雯則沒有露面。他提着只有個多月大的細仔，指他早產兼健康欠佳，現時身體情況已有好轉，間中會有嘔奶問題。他表示：「係一種緣分，好多人點博都博唔到個小朋友出嚟，我就唔知點解走咗3件出嚟。小朋友係我哋嘅財富，要慢慢悉心湊大佢哋。」

或5年後再追女

有網民問他會否再追女，他說：「或者5年後，如果情況許可就追多個女，都係嗰句，同我老婆都驚再追多個仔出嚟就大鑊！成屋都係男人，陽氣過盛。要畀老婆休息吓，呢3年佢都好辛苦，生咗3個。」有人問他有錢養咁多個？他即表示：「一定要有錢先養到咁多個？邊個話有錢先可以養咁多個？」

遭網民質疑教唔掂兒子

另亦有網民質疑佢教唔掂3個小朋友，佢即反擊：「咁都唔關你事㗎，係咪先？生3個係我嘅問題。其實擔心啲咩？不如擔心我嗰啲人顧吓自己先，連自己都未顧掂，做咩理我啲嘢？我又唔係要你幫我湊，係咪先？」

雯雯趁生日前喺IG玩「你問我答」，有人問雯雯會唔會想追多個女，雯雯指︰「雖然一直好想有個女，但冇得強求，而家已經好滿足。」另外，有網民叫雯雯提供一啲貼士畀準備做媽媽嘅朋友，佢就自爆︰「其實咁多胎都係意外。」其答覆即遭網民狂插：「究竟意外懷孕嘅定義係咩？」

網民：咪放對方出嚟為害人間

有網民就直接追問佢點解會話係意外，雯雯解釋：「其實大家會唔會太執着同埋敏感有冇避孕呢？ 我意外嘅意思係冇特別諗過同做啲乜嘢令到有小朋友，我意外嘅意思就係自然就有咗，我表達能力唔係太好。」不少網民也表示：「冇眼睇」且覺得3個小朋友相當無辜。

在雯雯生日兩夫婦在IG開Live，張致恒承認和雯雯經常嗌交，雯雯說：「我係對住佢先係咁！對住佢係好難可以控制！」張致恒更大爆雯雯發火時唔止動口咁簡單：「佢成隻碗掟落地下，然後爛晒，鎅到我成隻腳都係！」網民對此紛紛留言，為兩人送上祝福：「祝你地白頭到老，永結同心，咪放對方出嚟為害人間」。