張致恒（Steven）與老婆區燕雯（雯雯）於2019年奉子成婚，現時育有3名兒子，分別是3歲的大仔天寶、2歲的二仔天牧，以及出世只有個多月的細仔天朗，Steven曾被指負債纍纍，雖然他密密往內地登台賺錢還債，但工作量不多的他，要償還債務同時養大3個小朋友，早前老婆雯雯更暗示生活難捱，令不少網民也大擔心。近日Steven於社交網開直播，指細仔曾因早產而健康欠佳，但現時身體狀況已好轉，有網民質疑他教唔掂3個兒子，他時即反擊︰「咁都唔關你事㗎！」

Steven早前在IG開直播，與網民分享湊仔經，3個兒子也有出鏡，而老婆雯雯則沒有露面。他提着只有個多月大的細仔，指他早產兼健康欠佳，現時身體情況已有好轉，間中會有嘔奶問題。他表示：「係一種緣分，好多人點博都博唔到個小朋友出嚟，我就唔知點解走咗3件出嚟。小朋友係我哋嘅財富，要慢慢悉心湊大佢哋。」

或5年後再追女

有網民問他會否再追女，他說：「或者5年後，如果情況許可就追多個女，都係嗰句，同我老婆都驚再追多個仔出嚟就大鑊！成屋都係男人，陽氣過盛。要畀老婆休息吓，呢3年佢都好辛苦，生咗3個。」有人問他有錢養咁多個？他即表示：「一定要有錢先養到咁多個？邊個話有錢先可以養咁多個？」

遭網民質疑教唔掂兒子

另亦有網民質疑佢教唔掂3個小朋友，佢即反擊：「咁都唔關你事㗎，係咪先？生3個係我嘅問題。其實擔心啲咩？不如擔心我嗰啲人顧吓自己先，連自己都未顧掂，做咩理我啲嘢？我又唔係要你幫我湊，係咪先？」